وين أنت صدري ضاق من حر مابه ... وصبري نفد ياصاحبي وأنت ماجيت
تعال ما أطيق الفراق وعذابه ... مبطي وأنا من شوفتك ماتقهويت
تعبت من طول السهر والكئابه ... والليل يملاني حزن كل ممسيت
من غيبتك والجرح زاد ألتهابه ... والشوق يفضح لو كتمته وصديت
من غيبتك جاملت كل القرابه ... أضحك عبث وأكتم هموم وتناهيت
من غيبتك ماعاد تمطر سحابه ... حتى الكويت بغيبتك ماهي كويت
ياصاحبي حتى حروف الكتابه ... ملَت وهي تكتب قصايد ولا جيت
تعال دام الوصل مفتوح بابه ... ماتنفعك بكره ولو قلت ياليت