زين من سرعة 7.2 إلى سرعة 64 والله مسخرة

[zinger]

السلام عليكم
والله أكبر مسخره
انا مشترك بسرعة 7.2 زين ، وتفاجأت اليوم أن النت بطئ حده
وشفت الراوتر يشب ليت احمر أتصلت على زين وقلت لهم السالفه قالوا لي ان الخدم شغاله وياك 100 % لكن سوينالك داون جريد من تاريخ أمس
قلت له اوكي مافي مشكله لكن سألته جم السرعه اللي نزلتوها لي الحين رد على الموظف السرعه اقل من 128 وقلت له اخوي جدامي اشوف السرعه حدها 64 قال اي يمكن ماادري ويأكد أن السرعه اقل من128
وخايف يقول لي السرعه 64
حسبي الله ونعم الوكيل فيهم
يعني السرعه من 7.2 الى أدنى سرعه والحمدلله اني مشترك دي اس ال حق البيت والحين شبكت بالدي اس ال
خاف بعد شوي دايل اب نرجع للوراء​

 

[kuwaitok]

عادى اخوى زين عين عذارى

مخليه الشعب الكويتى حق الشفط الفلوس افضل واقوى خدمه عندهم
اهى اجهزه التحصيل؟ من بعد سالفه الخطوط الارضيه للحين عندك امل
فيهم

 

[الحريه وطن]

الناس هجت من شين الللي راح الوطنيه واللي راح فيفا

 

[مرتضى منصور]

صارت فيني واااااااايد اطوف اللمت وينزلون السرعة تصير زفت حدها وتكره النت لين يطوف الشهر وتبدي الحسبة اخوي نصيحة كنسلة وحول فيفا

 

[Se7T]

ماراح يتسنعون الا لما يشوفون في منافس يعدل مسار السوق
فيفا واقطع

 

[هادي33]

الله يعينم هالشركات !!!!

لآن مافي رجال يوصلون لهم كلمه عدله ....ويحترمون الناس ....

صرنا مثل المصريين ألي يعطينا على افانا نقوله (((كمااااااااااااااااان وكمااااااااااااااااااان )))

 

[zinger]

حسبنا الله ونعم الوكيل
كلمت مسؤولهم ويقول لي هذه سياسة وقانون

 

[تاجر 2008]

يحدون الناس تحول للخدمه الجديده ب 32 دينار

ويقولك 14 ميغا !!!! 14 طل بعيونهم

الداون لود ما يتجاوز ال 400 وباحسن حالاته 550

فيفا العادي يطوف ال 500

واتشراكهم معندل

كنسله حول فيفا يا غالي

اخوك بونرجس

 

[الهاشمي1]

مع احترامي للجميع لي راي مخالف بالنسبة لزين في حال انك لم تتجاوز الحد المسموح فيه بالتنزيل فان الداون لود يصل الى 900kb/s طبعا هذا بافضل حالاته اي مع قلة المستخدين وتوفر التغطية الازمة للشبكة واعني الاشتراك ابو 27 اما بالنسبة لفيفا فهي كناقة عريمان يعني عندما تشتغل تنهض باعلى سرعة وكما تفضل اخي ابو نرجس تصل بالداون لود الى 600 واما الوطنية فهي محترمة ومتواضعة السرعة اذا توفرت لها التغطية فهي تعطي للداون لود 220 بافضل الحالات هذا اجتهادي من واقع تجربة والله اعلم

 

[zinger]

شكرا عالتضويح ياغالي

 

[kuwaitok]

مع احترامي للجميع لي راي مخالف بالنسبة لزين في حال انك لم تتجاوز الحد المسموح فيه بالتنزيل فان الداون لود يصل الى 900kb/s طبعا هذا بافضل حالاته اي مع قلة المستخدين وتوفر التغطية الازمة للشبكة واعني الاشتراك ابو 27 اما بالنسبة لفيفا فهي كناقة عريمان يعني عندما تشتغل تنهض باعلى سرعة وكما تفضل اخي ابو نرجس تصل بالداون لود الى 600 واما الوطنية فهي محترمة ومتواضعة السرعة اذا توفرت لها التغطية فهي تعطي للداون لود 220 بافضل الحالات هذا اجتهادي من واقع تجربة والله اعلم

اخوى انا جرب الشركات الثلاث
اول شى اشتراك ابو27 مال زين مذكور بالعقد لامحدود مافيه شى تجاوز
الحد المسموح المصيبه بزين مو بس النت كل شى فيها غير مجانى نهب
إلى اخر نقطه وزين مستحيل تعطيك عرض واضح لازم تلف ودور اهم شى
عندها انه الزبون مايستفيد عندك ايزى اتعبى ب5 دنانير تعطيك 5 ثانيه بس
شوف اللعب ال5 تستعملها فقط الجمعه والسبت واذا ماستعملتها بااح
شوف العروض زين العجيبه

الفيفا استعملته بس المشكله البرج بعيد عن بيتنا مع انى مســـوى عقد
سنوى اتفهموا مشكلتى وكنسلوا اشتراكى مع انه موقع على عقد سنه
لو عند زين اغسل ايدك والله تدفع ألغاء العقد

الحل الوحيد عندى كان الوطنيه ولا دقيت عليهم جانى المندوب لى البيت
وشغل الراوتر وقعت العقد بدوانيه والســـــرعه ابرك بألف مره من زين ولا
مو مثل زين تعطيك شهر اوكى وبعدين شوف النت شلون يصير نظام ديزل
حده بطئ

احنا لما نعتب على زين لانها شركه كويتيه ميه بالميه وهذى معاملتها معانا
شوف اسعارها بره وعروضها راح اتعرف انه ماتستاهل انك اتحط شريحتها
بتلفونك لامصداقيه ولاعروض نفس البشر

 

[أبو ناصر العجمي]

فيفا وأقطع ..

 

[zinger]

حسبي الله ونعم الوكيل فيهم
اسلوبهم وصخ بالتعامل
حرام عليهم والله عطلوا اشغالنا
المشكلة انا نزلت القرأن الكريم لأكثر من قارئ يمكن 3 قراء حق الشهر الفضيل .
ومفروض يدزون لي مسج او طريقة ينبهون المشترك انه قرب ينهي استخدام الحد الأقصى للأيقو وانا اشتراكي 27 دينار شهريا والأشتراك بأوله المشكلة ينتهي 5 / 2010
يعني مصيبه ، والحين بنتظر لى 1/10/2009 علشان يفتحون السرعه مرة ثانية
لو اهم محترمين ويقدرون العملاء مفروض السرعه يخلونها اقل شئ 512 او 256 مو ادنى سرعه

لكن انا والله طافتني حركة بسويها فيهم ، الأشهر اللي طافت ماكنت اسوي داون لوود ، والشهر الياي قبل نهاية الشهر بسوي داون لود الحد الأقصى قبل انتهاء الشهر وكل شهر بسوي هالحركه ويكون جذي حللت الأشتراك وفلوسي منهم .
والله الحين سرعة الأيقو جنها دايل اب ويمكن دايل اب اسرع بوايد .

 

[alaa2003]

مشكور اخي زينجر على المقال الله يعينك معاهم
على العموم هددهم بالفصل وراح يعطوك شهر او شهرين مجاني عوض فيهم اللي راح

ثانيا انا اتفق مع الاخ الهاشمي كلامه هو الاصح من بين الردود
ثالثا الاخ هادي 32 انا لا اتفق معاك نهائيا فكلامك على الخطأ 100%
المصريين اعطوا درسا لشركات الانترنت منذ ايام لما حبت الشركات انهم يحجموا الدي اي ال قام نص المصريين فصل النت و لما حست الشركات بكده قالوا لا احنا قصدنا المشتركين الجدد بس ولمدة شهرين كترشيد استهلاكي
قولي انت عملت ايه ؟
ملحوظه : مصر تمد ثلاث كيبلات بحرية جديدة لنفسها فقط تخيل احنا كلنا شغالين على كبل واحد

 

[الحريه وطن]

عليكم بالوطنيه فهي تعمل بصمت وشغلهم مضبوط واجواد


الوطنيه عالم جميل

 

[zinger]

هم سعرهم عالي

 

[zinger]

هم الوطنية سعرهم عالي​

 

[اHYM]

و الزين شركة زباله و حراميه مهما سويت و حسيت نغسك ذكي هم بايقينك بايقينك

 

[خالد الوافي]

هههههههههه اثاري الشباب مثلي زهقانين من زين تصدقون اني حاقد عالشركه عن جد وكل يوم ادعي عليهم ,., انا الشبكه مش بطيئه وبس لا كل 10 دقايق يفصل مااقول الا حسبي الله عليهم لا وذابحينا بالرسايل والقمار اللي يسوونه كل يوم يقولك ادخل السحب على سيارة هوندا , اخاف صج علينا هالسوالف ولا عمري شفت احد ربح منهم شي

 

[BoKhaled77]

السلام عليكم

يا شباب قولوا لا اله الا الله

خلونا نتكلم بواقعيه شوي

اساس المشكله اثنان لا ثالث لهم

اولا : الحكومه ممثله بوزارة المواصلات اللي ما تطبق القوانين وعلى ما قالوا خلوا القرعه ترعى وصارت الشركات تزيد الاسعار على كيفها والخدمات من سيئ الى اسوأ (ولكم في دخول فيفا السوق لما كنسلوا احتساب المكالمات الارضيه للنقال وتذكرون ان الشركات كانت تتحجج بأن هالأمر بيد وزارة المواصلات ولما دخلت فيفا على طول كنسلت الشركات الثانيه احتساب المكالمات الارضيه وبكل بجاحه يقولون في دعاياتهم ما معناه ان راحة عملائنا الاهم ومن هالكلام اللي ماخوذ خيره

ثانيا : الشعب, لأن الشعب يشوف النصب في مجالات كثيره وساكت يا اخي ما نبي نقول الكل يقاطع لكن لو قاطعت نسبه مؤثره خلنا نقول 60 الى 70% من العملاء اسبوع بس شوفوا شنو راح يصير بهالشركات اللي استخفت بالشعب وشافته غلبان قالوا يا عمي ما حواليكم احد سووا اللي تبونه لكن لما يشوفون حمله شعبيه راح يتسنعون

وعلى اساس اني ما اعمم انتم الله يهديكم ماخذين فكره غلط عن هالنظام من الاشتراكات لأنه يعنمد على عوامل ومنها :

1- عدد المشتركين معاك بالمنطقه, كل ما زاد العدد كل ما قلت جودة الخدمه

2- بعدك عن برج التغطيه, كل ما بعدت صارت الاشاره تقطع ويمكن ما توصل

3- البرج يعطيك كحد اقصى 7.2 ميجا وهذا ما يعادل تقريبا 921.5 كيلوبايت بالثانيه مثل ما قال احد الاخوان لكن هل معدات وسيرفرات الشركه تتحمل عدد الابراج اللي بالكويت ككل وعدد المشتركين ؟ انا اشك بهذا

4- هذا النوع من الاشتراكات يعتبر حل مثالي للتصفح والتحميل البسيط مو الله يهديكم الواحد شغال على التورنت والا ينزل ملفات كبيره من النت ويقول اخر شي يصير بطئ, انا معاكم المفروض يكون الاشتراك مفتوح لكن هذي سياسة الشركات بمباركة وزارة المواصلات والحد الاقصى للتحميل تقريبا 10 جيجا واللي يحملون ملفات من النت يعرفون انها ما تكمل معاهم يومين الى ثلاثه

الكلام بهالموضوع يطول وانا والله لا امدح شركه عن شركه كل واحد وله رأي غير عن الثاني لكن بالنسبه لفيفا صدقوني انتظروا عليها شوي وراح تترحمون على زين والوطنيه فيفا اللي مساعدها قلة المشتركين والعالم الحين قاعد يحولون اشتراكاتهم الى فيفا والخوف انها ما تقدر تتحمل عدد المشتركين مستقبلا وراح يصير فيها مثل ما صار بكيمز اول ما ردت وسوت عروض والعالم قامت تحول لها وشلون كانت الاشتراكات تفصل وبطيئه لأن سيرفرهم كان يتحمل على ما اذكر 3000 مستخدم بنفس الوقت اذا مو اقل والعرض اللي سووه ايام ارض المعارض اشترك تقريبا 10000 مستخدم وشوفوا السيرفر شنو صار فيه وحلوا المشكله بس بعد خراب مالطه

في امان الله جميعا