مطلوب تصليح هاردسك خارجي

[kuwaityvip]

عندي هاردسك خارجي طاح مني وصار ما يشتغل مع اني احس فيه حركه لكن ما يستجيب مع الكمبيوتر

منو يقدر يصلحه او يعرف محل يدلني عليه

والله يعطيك العافيه

 

[مؤشردوت]

تصليحه يكلف

 

[kuwaityvip]

تصليحه يكلف

يعطيك العافيه مو مشكله المهم يتصلح واحصل البيانات اللي فيه

 

[waleed_35]

السلام عليكم

اخوي انا ابي اقول لك طريقه ان شاءالله تضبط معاك ويشتغل الهارد حقك
تلف الواير علي الهارد نفسه حيل وتركبه بجهازك وتنطر عليه شويه وراح يشتغل لان صارت معاي نفس الحركه ولفيته علي الهارد واشتغل معاي ونسخت الملفات كلها وكل محل اروح له يقولي قطه خلاص ماراح يشتغل معاك انت حاول فيه وقولي شيصير معاك

 

[Tony Elmon]

إذا فيه معلومات ضرورية ضرورية وإحط خط تحت كلمت ضرورية 100% أنا أقدر أسترجعها لك بس يكلفك و تلفوني 66915580

 

[برقان 2008]

حاول اول شي تغير وايرات الهاردسك وغير الكمبيوتر حطه على ثاني لأنه إحتمال وصل usb خربانه


الخطوه الثانيه:

إن كان العطل في الهاردسك انت مركبة الخارجي فاكو اي مشكله تركب له كيس ثاني لأنه يمكن الكيس خربان

وإن كان شد بلاده حاول فيه اكثر من مره فإن ما اشتغل اكسر الكيس او الكفر الخارجي وركبه على كيس ثاني وإنشاء الله يشتغل

فماكو مشكله أخوي لأن الخارجي ما يعتبر بوت يعني معلوماتك محفوظه والأمور طبيعية لا تحاتي

واتمنى اني اكون وصلت ويالك لحل

وبالتوفيق

 

[Rowdy]

كلام برقان صحيح غير الكيس يمكن يكون المشكلة من الرووس الداخليه انكسر فيها واحد واخترب الكيس واذا مانفع غير الواير الكيبل يو اس بي واحسن تغير الكيس تأخذ جديد وقبل لا تغير الكيس روح حق محل سوفت ايلاند بمجمع القيروان بحولي تحصلهم فوق وادخل الصيانه عندهم واشرحلهم مشكلتك وقولهم يحطون لك كيس مستعمل بش علشان تجيك اذا شغال ولآ لا او يفحصونه لك واذا طلع مافيه شي غير الكيس غيره عندهم لآنه عندهم قطع الغيار واتمنى التوفيق للجميع

 

[ThankYou]

أخواني مع احترامي لجميع الاراء بس اقول حق الاخ فقط اللي بقدر يساعدك الاخ Elmon وباجي الاراء اسمح لي غير صحيحة وهذا عن تجربة .. وانا الاخ elmon ما اعرفه وعلى شفته بس شكله فاهم شغله . اذا الابرة حق الهارد تحركت من مكانها ما يفيدك حتى لو تغير مليون كيس ... لازم تجيب هارد نفس اللي عندك بالضبط تماما 100 % وتفتح الاثنين وتشيل الاقراص اللي بالداخل من الاول للثاني اي من الخرنان الى الجديد. وطبعا هذا الشغل ما يساوي اللى فني محترف علشان ما يخرف الهارد الثاني. والطريقة الثانية مكلفة وتاخذ وقت ايضا.

تمنياتي لك بالتوفيق وللجميع احترامي وتقديري

 

[kuwaityvip]

جزاكم الله خير
وبيض الله وجيهكم والله انكم ما قصرتوا

انا جربت تغيير الكيس وماكو فايده وحطيته على جهاز غير جهازي نفس الشي

حتى جربت وحطيته على كبيوتر دسك توب هاردسك اضافي وما اشتغل

لكن

لقيت محل بحولي قال لي يرجع البيانات اللي فيه ب 25 دينار حتى لو كان خربان


مشكورين والله يعطيكم العافيه

 

[برقان 2008]

الأخ ثنك يو مع احترامي لك وللأخ توني اهو شنو قال من طريقه علشان يتصلح فقط قال ادفع وانا اطلع المعلومات

اخي بالنسبة للصيانه من المعروف ان تبدأ بارخص واسهل الطرق يمكن تكون هي السبب حتى لا تلجأ إلى التصليح
وهذا من باب النصيحه
ووشي ثاني كما تفضلت بفتح الهاردسك من داخل الأخ توني لم يذكر هذا الشي فكيف عرفت انه يرد عمل هذا الشي

وللعلم لا يفتح الهاردسك إلا من قبل الشركه المصنعه وليس بورشه بحولي
لأن أماكن تصنيع اجهزه مثل هذه الدقه تكون معقمه اكثر من غرف العمليات وهذا للعلم

ولكن عندما يبدا من الصفر ليس بغلط ولكن المنطق يقول هكذا ابدا بالأرخص والاسهل لعلك تجد الحل ثم تلجا إلى محلات حولي

وللعلم اخي الفاضل انا عندي محل بحولي بس ما ابي دعاية لمحلي ولا اعطي عنواني لأني فقط اريد النصيحه

وهذي المعلومات قلتها لوجه الله

ولن اضع عنواني لأني حقيقة قلتها من باب النصيحه وأخوة المنتدى




والف شكر لكم اخواني

ولا احد يزعل وكل الهدف هو الفائده لأخونا وليس من باب ان يدفع لكي يكون الحل