مشروع المجلات الاعلانيه ... ارجو الدخول

[كحيلان العازمي]

السلام عليكم ورحمة الله وبركاته

اخواني الكرام

في بالي مشروع المجلات اعلانيه مثل ... اعلانات .. تواصل ... الرائده ...

اقصد مثل الصدى والوسيط بس على شكل مجله اعلانيه

فنبي خبرتكم يااخواني

بخصوص الترخيص المطلوب والاوراق المطلوبه

ومارايكم بالمشروع بشكل عام

وشكرا لكم

 

[بو متعب]

من الحين اقول لك خسران وغير رايك احسن لك نصيحة

 

[LoVer26]

اخوي فاشله انا اذكر قبل جم سنه كان فيه مجله اسمها الامتياز نفس ماقلت انت اعلانيه
مانزل منها غير عدد واحد بس وبعدين تسكرت ومامنها فايده اتمني اني فدتك وشكرا

 

[ساحل الليل]

اتمنى من الاخوه اللي يقولون فاشل يحطون سبب فشلهم

اخوي كحيلان انا اشوف انه مشروع ناجح

يعني شوف مثلا مجلة تواصل فيها اكثر من 50 صحه

وتقريبا عدد الاعلانات الموجوده فيه لو تعد الاسعار يوصل 5 الاف دينار اسبوعيا

تصوروا 5 الاف دينار اسبوعيا

يعني بالشهر 20 الف دينار للمجله

والمجله يصدر منها تقريبا 20 الف نسخه اسبوعيا لمنطقة الجهراء فقط

توكل على الله يااخوي انا اشوفه مشروع ناجح

واتمنى اللي يعرف شي يساعد الاخ كحيلان

 

[كحيلان العازمي]

اخواني الكرام بو متعب .. LoVer26 .. ساحل الليل
شكرا لكم على مروركم يااخواني
وبانتظار راي باقي الاخوه

 

[الـصانع]

لا اقدر اقول ناجح ولا فاشل

لكن بقولك يعتبر مشروع مغامره ..

اخذ مثال الوسيط تقريبا اشهر صحيفه اعلانيه الاعلان الواحد 2.500 وتقريبا كل اسوب فوق الالف اعلان .. والناس تحط فيها اعلانات لشهرتها فقط ولأقدميتها بالمجال

نفس الموضوع مع صحق جديده ولكنها فشلت .. السبب انها لم تقدم شي تنافس فيه الصحف الاخرى مثل انتشار اكثر سعر اقل مساحه اكبر للاعلان ..

امور يبيلها تفكير قبل كل شي

وموفق ان شاء الله

 

[nawafooooooo]

المشروع حلو بس يبيله صبر وتفرغ وتوضف ناس ثقه

والرخصه صعب انك اطلعها بالوقت الحالي

بس اعرف واحد عنده رخصه ويبي يبيعها او يأجرها اذا تبي اكلمه لك بلغني على الخاص

 

[بوفهيد]

اتمنى من الاخوه اللي يقولون فاشل يحطون سبب فشلهم

انا بقولك اسباب الخسارة اغلبية من دخل هذا المجال
1- سوء الادارة ( اختيار موظفين غير مناسبين و صرف مبالغ في غير مكانها)
2- النفس القصير ( تجعل صاحب المشروع لايستطيع الاستمرار بعد مرور 6 شهور خصوصا ان مثل هذة المشاريع تحتاج لمدة طويلة لجني الارباح ).
3- عدم اعداد دراسة جدوي اقتصادية بمركز متخصص .
4- ارتفاع تكاليف التراخيص .
5- ارتفاع تكاليف الطباعه .
6- سوء توزيع المجلة . ( في حال عدم استفادة المعلن تأكد لن تخسرة فقط بس ستخسر سمعه المجلة بالكامل )
7- و الاهم من كل هذا هل فعلا السوق يستوعب المجلة و الرد من خلال النقطة رقم ( 3 ) .

بالنهاية من يساعدك في اتخاذ القرار الصحيح بعد توفيق رب العالمين نتيجة داسة الجدوي و اكرر لاتبخل على الدراسة و سوها بمركز محترم لان هذي بتوفر عليك الخسارة و بتحطلك النقاط الاساسية للمشروع و تحدد لك الرواتب و كل شئ ، اغلب ربعنا يسوي الدراسة بنفسة و هذا خطأ اذا ماكنت ممارس و صاحب خبرة في هذا المجال .

و الله يوفقك اخيي

 

[general]

الاخ كحيلان العازمي
اذا كنت توجه استفساراتك للعامه فيشرفني اكون من الي اعلق على موضوعك واقولك ياها 3 مرات مشروع فاشل فاشل فاشل . واذا كنت عاقل اكتفي بالاجابه فقط والي يقولك الاعلانات بالاف الدنانير الظاهر ملتبس عليهم الامر عبالهم تبي تشتري جريده الوطن .

 

[بو متعب]

يا اخوان تبون النصيحة دفعو لي فلوس علشان اليوم محد ياخذ النصيحة ببلاش قلنا لكم مشروع فاشل البعض علق لا ناجح لو ناجح ليش ما سويته انت ؟
حبيبي كحيلان اذا عندك كم بيزة خشها لان صاحب مجلة ......... باع 7 عمارات وكل مرة يقول له اللبناني مدير اعماله خيو لازم تفت المشروع بدأ يشتغل والاهبل يبيع عمارة وتاليتها على الحديده ولبناني باقه ونحاش يعني فت ما يقل عن 3 مليون وابشرك مفلس الحين بالعربي
هالمشروع يبيله بنات الليل تسوق له عرفت الحين سبب نجاح بعض المجلات والجرايد والمطبوعات وحتى بعض الفضائيات وبعض العاملين على هذا الشي ما عندهم لا قيم ولا اخلاق مقابل الفلوس انت شفت مسوق من الرجال يوم من الايام كلهم مسوقات بنات وجنز والصدر متفوخ وهات يا مفاتن واغراء علشان الشباب وحتى الشياب يحبون الحموضه يعني مشروع بنات الليل وليس مشروع مجلة من الاخر عجبك الكلام او انت تطقس براحتك وبعدها راح تقول صح كلام هالرجال والحين ابي منك 200 دينار نظير هذه الاستشارة والسلام ختام