استشاره ...مدينة صباح !

[kuwwait]

السلام عليكم ..

اتمنى من لديه خبره ان يدلو بدلوه في هذا الموضوع ..
عندي طلب اسكاني 1995 وطلبونا تخصيص مدينة صباح الاحمد ورحت وخصصت وواعدوني 12/7/2009 وبكل صراحه ماني راغب في صباح الاحمد
لانها بعيده وقريبه من المناطق المتلوثه ام الهيمان والمصانع

لكن هذا هو الخيار المتاح امامي ..حاليا

سؤالي هو هل لو انتظر يحوشني دور في مدينة جابر
وماهي البدائل المتاحه امامي ..وهل عندكم اقتراحات
اتمنى من الجميع المشاركه ولكم الشكر مقدما​

 

[qanon]

اول شى اقولك مبروك يا الغالى

ونصيحتى لك ان عصفور باليد احسن من عشرة بالشيرة

وبعدين الحين الكل عنده سيارة

والشوارع كبيرة وحلوة من جنوب الكويت لى شمالها

وهم ما يمنع انك تسال بالاسكان عن الفرص المتوفرة لك

 

[kuwwait]

اول شى اقولك مبروك يا الغالى

ونصيحتى لك ان عصفور باليد احسن من عشرة بالشيرة

وبعدين الحين الكل عنده سيارة

والشوارع كبيرة وحلوة من جنوب الكويت لى شمالها

وهم ما يمنع انك تسال بالاسكان عن الفرص المتوفرة لك

الله يبارك فيك يا qanon

ومشكور على هالنصيحه الطيبه وان شاء الله راح اسأل الاسكان
ونشوف الخيارات ..عساك على القوه

ومنتظر مشاركات الاخوان

 

[المنظور الشامل]

مبروك وان شاء الله تلاقي الموقع الطيب والكويت أول وأخيرا صغيره ومثل ما قال اخونا عصفور باليد ولا مليون بالشجره بس سؤالي تدري مته راح تبني تاكد من الاسكان ولد عمي أخاف العمليه مطوله

 

[الحريه وطن]

بما ان المستشار مؤتمن

انا اقول لك بالفم المليان هج عنها ويرزقك الله الناس زهقانه من المنطقه العاشره ويبون يقلعون الناس لجنوب الكويت
البصمه علي الابواب والشوارع تعيسه وزحمه

وبصرك

 

[kuwwait]

مبروك وان شاء الله تلاقي الموقع الطيب والكويت أول وأخيرا صغيره ومثل ما قال اخونا عصفور باليد ولا مليون بالشجره بس سؤالي تدري مته راح تبني تاكد من الاسكان ولد عمي أخاف العمليه مطوله

الله يبارك فيك اخوي المنظور الشامل وجزاك الله خير ..وصدقت العمليه شكلها مطوله وعلى الخرايط
يعني اقل شي سنتين 3 سنوات واليوم الصاله فاضيه دليل على ان مافيها اقبال ..والله يكتب اللى فيه الخير ..وشاكر لك على المداخله الطيبه
ولك الشكر

 

[kuwwait]

بما ان المستشار مؤتمن

انا اقول لك بالفم المليان هج عنها ويرزقك الله الناس زهقانه من المنطقه العاشره ويبون يقلعون الناس لجنوب الكويت
البصمه علي الابواب والشوارع تعيسه وزحمه

وبصرك

اشكرك على النصيحه الغاليه ..انا اكثر شي مخليني اتردد ان مافيها اقبال ثانيا عندها تلوث غير طبيعي وتوني قاري موضوع عن قربها من مكان ردم النفايات السائله ؟؟

لكن اللي فيه الخير ربك يجيبه ان شاء الله وماقصرت يالغالي

 

[kaled9977]

السلام عليكم اخذ النصيحه

اخوى اول شى فكر بعيالك شبعد المعاهد والجامعات عنهم
ثانى شى متى تخلص الخدمات والناس تسكن خلك واقعى
فهد الاحمد من وزعوها 2006 لها 3 سنوات للحين ماسكنوها مع العلم لما توزعت كانت الخدمات جاهزه
يعنى صباح الاحمد مو اقل من 6 سنوات الى 8 سنوات
وبعدين روح شوف المنطقه وينها قلع مدى منطقه ملوثه ومعج ومقطوعه عن العالم اقرب منطقه عندك ام الهيمان بحدود عشرين كيلو
حتى الوزيره رايحه لها بهيلكوبتر من بعدها
لو تشترى ابركلك وهذى نصيحتى لك
فكر بمستقبل اعيالك والخدمات مثل الكليات
والله يوفقك

 

[kuwwait]

السلام عليكم اخذ النصيحه

اخوى اول شى فكر بعيالك شبعد المعاهد والجامعات عنهم
ثانى شى متى تخلص الخدمات والناس تسكن خلك واقعى
فهد الاحمد من وزعوها 2006 لها 3 سنوات للحين ماسكنوها مع العلم لما توزعت كانت الخدمات جاهزه
يعنى صباح الاحمد مو اقل من 6 سنوات الى 8 سنوات
وبعدين روح شوف المنطقه وينها قلع مدى منطقه ملوثه ومعج ومقطوعه عن العالم اقرب منطقه عندك ام الهيمان بحدود عشرين كيلو
حتى الوزيره رايحه لها بهيلكوبتر من بعدها
لو تشترى ابركلك وهذى نصيحتى لك
فكر بمستقبل اعيالك والخدمات مثل الكليات
والله يوفقك

وعليكم السلام اخوي خالد ..
صدقت في كل كلمه قلتها ..المشكله درب وتلوث وغير مرغوبه ؟
يعني الواحد يستخير ويشوف له مشروع ثاني ابرك من هالمدينه
الدايخه اللى ماادري منو مختار موقعها وعلى اي اساس !؟

ونصايحك في محلها وكفيت ووفيت ..
شاكر لك مرورك وتقبل تحياتي

 

[بو متعب]

لو ينبني يمها المطار والجامعة ونادي اعتقد بتحيا المنطقة مو ما فيها شي

 

[saket]

الحين الواحد يدوور البيت دووره ويفتك من الايجارات الصايره نار وووماكو بعد على السياره مثال ام الهيمان مكان احد يتقدم عليهااااااااااااااااا وشووف الحين​

 

[المنظور الشامل]

كفو شاب ناس تعاونوا ما ذلو ومن شاور ما ضاع

 

[بوناصر10]

السلام عليكم


اخوى اذا ماعندك تشترى بيت انا اشور عليك تبنيه على 70 الف اربع شقق واذا تقدر اتخليها 6 هم احسن لاانه افتكر توزيعكم اذا مانى غلطان 600 متر يعنى مساحه طيبه للبنيان واجره كله فى البيع يسوه لاانه امقسم اجارات واذا ودك اتخليه اطلع سكنه بالعاصمه ابلاش وهم اتحط مصرف جيب وانت صاحب القرار ياخوى ومبروك وموفق




أخوك بوناصر

 

[ابــوخــالــد]

هج الناس زهقانه من المنطقه العاشره

الله يرحم والديك اذا تعرف احد متوهق بالعاشره عطني خبر

 

[kaled9977]

اخوى لا يقولون لك اجارات وحلم وردى من ياجر عندك هناك يمكن رعيان الغنم او صبيان المزارع
ولا يقولون لك راح يبنون فيها جامعات ومدينه متكامله
كلنا عارفين الكويت بكبرها مافيها غير جامعه وحده من سنة جدى
واخر مستشفى انشئ عا م 1979
وبعدين نصيحه لوجه الله فكر باسؤ احتمال يحوشك بيت شارع واحد
من ياخذه منك لايقولون لك تبدل ومدرى شنو انت ماعندك غير طلب واحد لا تفرط فيه
تراك المسؤل عن عيالك وبعتقادى ماراح يصير مشروع اسؤ منه
والسلام

 

[الجود الاول]

الاخ السائل

بكل بساطه

افتح قوقل واضغط هيئه البيئه مدينه صباح الاحمد

واقرا بنفسك شلون هيئه البيئه قدمت شكوى على الاسكان

لموافقتها على مشروع مدينه صباح الاحمد

فى ارض لا تصلح للسكن الادمى مع تلوث الجو الرهيب

وعدم تفاعل التربه مع اساسات البنيان للمخلفات المردومه

الا اذا انت فدائى ومضحى بصحتك وصحه عيالك الله يحفظكم​

 

[kuwwait]

اشكركم جميعا على التعليق والنصيحه ..

استفدت من هالردود كثيرا .. وانطباعي عن المنطقه انها بعيده جدا
ولاتصلح للسكن بسبب مشاكلها البيئيه وتوزيعها على الخريطه يعني
((قال قوه ..قال توه ))
الله يكتب لنا اللى فيه الخير
وجزاكم الله كل خير