هل يحق للبنك ان ياخذ مبلغ مكافاة نهاية الخدمه؟

[abosood]

السلام عليكم ور حمة الله وبركاته....

بعد ان انهيت اوراق تقاعدي تم تحويل مبلغ مكافأة نهاية الخدمه لحسابي للبنك الذي اتعامل معه , فقام البنك باخذ المبلغ كاملا!! وعند سؤالي لقسم المتابعه والتحصيل في البنك قيله لي ان هذا ضمان لحقوقهم!
علما بأن لدى قرض وانا ملتزم بالسداد ولم يكن علي اي تأخير..!
وتم ابلاغي بأنهم سيأخذون اي مبلغ ينزل في حسابي..وتم كذلك تهديدي!!برفع قضية علي وضبط واحضار!!
وعندما ابلغتهم باني سأرفع قضيه عليهم قالوا بأنهم سيردون علي بالمثل!!

هل يحق لهم اخذ المبلغ كاملا!! ومن غير علمي مسبقا بذلك..؟
::verymad::

ونرجوا افادتكم بموضوعنا ولكم جزيل الشكر..

 

[قناص_السوق]

مشكله هالبنوك اتمنى يلقون شي اسمه وزير مالية .... صراحه ويكون هناك بنك حكومي الغرض منه الحفاظ على المواطنين وليس بنك تجاري هدفه تحقيق الربا والعياذ بالله

 

[fayoona74]

لايجووووووووووووووووووووووووووووووووز اذا مثل ماتقول روح ارفع دعوى مستعجلة باثبات الحجز على كافة مستحقاتك المودعة عندهم وبعدها ارفع دعوى مدنية برد المبالغ والتعويض

 

[abosood]

شكرا للجميع علما بانى طلبت من البنك اثبات ان المبلغ محجوز ورفضوا واذا حاولت اسحب يطلع لا يوجد رصيد واذا دشيت على موقع البنك الفلوس موجوده ؟ شنو العمل؟

 

[قناص_السوق]

اتوقع تطلب ندب خبير من المحكمه يروح مقر البنك ويجيك نفس ما سوى الزميل خالد الزامل و موقعه http://www.chakbom.com/

والمحامي والمحامية يفيدونك اكثر


وما ادري بصراحه اذا تعتبر جنايه ولا لأ لان المبلغ اختفى من رصيدك فجأه جنها سرقه ؟ ؟ ؟ اتوقع فيها جنايه ... لانك ما تدري شلون اختفى و منو خذى المبلغ وانت تشك ان البنك اهو السارق

 

[fayoona74]

طلع من دوامك مستند بان المبلغ متحول وطلع كشف حساب انه مو موجود والعمليات اللي تمت منك خلال المدة من ايداع المبلغ من البنك المركزي وحتى تاريخ استخراجك للكشف واتوكل على الله وروح لقاضي الامور المستعجلة انا رايي مدني مو جناية لان المبلغ محجوز عندهم والله اعلم
وترا اخوي هم اتاكد مو معقول البنك يقولولك هالكلام مني والدرب راجع القسم القانوني عندهم وشوف شسالفة خلك من موظفين الكاونتر

 

[abosood]

مشكوره اختى العزيزه على المتابعه مع الاسف اللى قالى هالكلام قسم المتابعه والتحصيل وهو القسم القانونى فى البنك الرئيسى واللى صدمنى اللهجه اللى تتكلم بها المسؤولة وكانها تكلم حرامى بايق البنك وعند سؤالى عن الفلوس والحجز ومتى ينشال كانت ترد لا تضيع وقتك ووقتى الموضوع انتهى عندما قلت انى ذاهب الى محامى قالت حنا عندنا محامين وقبل ان ترفع قضيتك نكون حطينا عليك القاء قبض وضبط واحضار وطبعا فهمت من هالكلام انه تهديد عصبت وقلت حنا فى دولة قانون واللى له حق بياخذه والضعيف هو اللى يهدد والله قهر اليوم نزل بدل الاجار ولا اقدرت اسحبه خلونى على الحديده حسبي الله ونعم الوكيل اللهم اجرنا فى مصيبتنا واخلفنا خير منها

 

[fayoona74]

انا اقول هم راجع واحد من مستشارينهم يفهمك الوضع عدل لان كلامهم كان عندك مديونية مو مسددها مو معقول اكيد في لبس بالموضوع

 

[بوغمازات]

ياخوي ,,, شي طبيعي اذا نزلك مبلغ من المال في حسابك وانت بالاصل عليك قسط قرض يحجزون البنك علي المبلغ ضمان لحقوقهم ,,, وهذا اجراء طبيعي من البنك ,,,,

 

[abosood]

ياختى لا توجد مديونية انما قرض وانا ملتزم ولم اطوف شهر ارجو من الجميع الحذر عند التقاعد وخاصة اللى عنده قرض وسامحونا لاحول ولا قوة الا بالله

 

[fayoona74]

عيل مالك الا قاضي الأمور المستعجلة روح المحكمة باسرع وقت وضباط الدعاوى هناك يسوون لك الصحيفة ويوجهونك بس اخذ معاك كشف حساب مفصل عشان يبين ان رصيدك خالي وانك منتظم بدفع اقساط القرض وكتاب من جهة عملك او التأمينات بخصوص تحويل مكافاتك وعلى فكرة انت قلت ان ماعليك مديونية انما قرض واحب اوضح ان ان القرض عبارة عن مديونية للبنك هذا للتوضيح بس وبالتوفيق

 

[ددلي كورت]

السلام عليكم
واحد من اخواني قدم استقالته من الدفاع وعطوه 5رواتب اجازات وراتبين من الوزير
تقرريبا 6الاف دينار وبعدين حجزو على المبلغ راجع البنك قالوله نحفض حقنا وكانو
ياخذون اقساطهم كل شهرقعد تقريبا 4 شهور وبعدين توضف بالداخليه وبطلو البلوك من المبلغ الباقي واستلمه هذ بنك بيت التمويل مادري عن البنوك الربويه الله يبعدنا عنها انشاالله تفيدك بشي اسالفه هذي

 

[fayoona74]

هذي غير سالفة بعد الواحد يتعب والبنك يحجز عالاقل اذا عنده سوابق بعدم الدفع نقول يمكن بس اذا الريال منتظم شكو الحجز بعد بس ترا محامين بيت التمويل مضبوطين وشطار حيل ماعندهم ثغرات

 

[ددلي كورت]

لااختي اهم قالو ان المبلغ 6الاف واهو مطلوب سيارة 7الاف ياخذون القسط كل شهر انه دوامه دز ال6الاف باسم انهاء خدمة فحجزو عليها النظام القديم تستلم فلوس انهاء الخدمة شيك والبنوك اشتكت على الوزاراة وقامت الوزارات تدزها للبنك عشان البنك يحفظ حقه هذا الاستقاله مو التقاعد

 

[fayoona74]

اهااا فهمت السالفة انا اقول بيت التمويل مو معقول يسوون اجراء غلط مستشارينهم حيل قواية بالقانون لان ماعنده راتب يستقطعون منه جذي معقول ماله انه يدور له وظيفة بسرعه ويبيلهم شهادة راتب ويفتك من هالسالفة

 

[أبـ عامر ـو]

السلام عليكم ورحمة الله

أخواني لدي سؤال إذا كان الراتب التقاعدي يتوافق مع شروط البنك المركزي يعني النسبه في الاقساط أقل من 40% من أجمالي الراتب هل أيضاً يحجزون على مبلغ مكافئة نهاية الخدمة ؟

 

[fayoona74]

البنك اذا تقاعدت يحجز على مكافاتك واذا بدا ينزل راتبك التقاعدي يرفعون الحجز واذا تبي ترفع الحجز من البداية تروح حق فرعك وتقدم لهم ورقة تثبت انك تستحق راتب تقاعدي تاخذها من التامينات الاجتماعية

 

[fayoona74]

تنويه اجابتي لابو سعود كانت غير دقيقة و الصحيح ان البنك يستطيع ان يحجز على المبالغ المستحقة لحين تقديم مايثبت استحقاقك لراتب تقاعدي او راتب حال قبولك بوظيفة اخرى عن طريق مستند يقدم للبنك كاثبات اما من التامينات الاجتماعية او من العمل الجديد وفي هذه الحالة يتم رفع الحجز
لذا اقتضى التنويه وااسف للخطا وعدم الدقة بالاجابة للسيد بوسعود

 

[الـمـحـامـي]

بسم الله الرحمن الرحيم

نشكر جميع الاخوان على المساهمة بالرد

الاجابة /

اقرار المديونية المذيل بالصيغة التنفيذية له مدة قانونية أقصاها (15) خمسة عشر عاما طبقا للتقادم العام الطويل في القانون المدني اعتبارا من تاريخ الاستحقاق.. طبقا للمادة 438 مدني أو بمرور خمس سنوات اذا كانت بحق من الحقوق الدورية المتجددة كالمرتبات والمعاشات واجرة المباني وخلافه طبقا للمادة 439 مدني.. واصحاب المهن الحرة كالاطباء والصيادلة والمحامين والمهندسين والمعلمين على ان تكون مقابل ما ادوه من اعمال طبقا للمادة 440 مدني.. أو بمرور عام واحد اذا تعلقت بحقوق التجار والصناع واصحاب الفنادق والمطاعم وحقوق الخدم والعمال ومن في حكمهم طبقا للمادة 442 مدني..
أما عن علاقته بالشيك فكل منهما له حكم خاص.. فاقرار المديونية المذيل بالصيغة التنفيذيه تستطيع النفيذ به بالطريق المدني.. بعكس الشيك الذي تستطيع تقديمه للبنك وصرفه.. وفي حالة عدم وجود رصيد او لا يكفي الرصيد تستطيع شكايته جزائيا عن طريق جنحة اعطاء شيك من غير رصيد.. أو عن الطريق المدني بأمر أداء يقدم للقاضي ويذيل بالصيغة التنفيذية.


المحامي / عوض ماطر المطيري

99420979