سيارة ولا سيارتين ؟؟ الكل يشارك ..

[أبوفلان]

,
,


السلام عليكم يا أخوان ..


الموضوع : إني محتار بين شراء إما سيارتين وهم :


أوريون 2007 ..

والثانية : يوكن 2005 ..

المديونية للسيارتين راح تكون 12 ألف دينار كوتي تقريبا ..

والقسط للسيارتين راح يكون 200 دينار ..



فإما أشتري هالسيارتين أو أشتري السيارة الثانية :


لكزس LS 460 الي هي أكبر حجم ..

وراح تكون المديونية 20 ألف دينار تقريبا طبعا ..

والقسط راح يكون 270 دينار ..




أريد أراؤكم بعد أن يقارن الكل بين : الاستعمال , وغلاء قطع الغيار , وصرف البانزين ..



وفقكم الله لكل خير ..


,
,

 

[AL MUTAIRI]

السلام عليكم

اخوي لازم تطرح على نفسك سؤال
أنت شنو محتاج من السياره ؟

هل انت محتاج سياره صالون فيها فخامه او لمسات من الفخامه
او أقتصاديه وغيره وغيره

واذا أنت تبي سياره لأستخدامك الشخصي
وعندك عائلة وتبي سياره أخرى عائلية
هم أمامك خيارات كثيره

او تبي جيب لأستخدام البر والطلعات

حدد أستخدامك وان شاءالله الأخوان بيفيدونك

لأنه اذا تبي الجيب للبر مايستاهل تدفع مبلغ فوق 4500 بجيب يوكون
وعندك خيارات أفضل
وسيارات أفضل من اليوكون فالبر
وبنفس السعر وبأقل من السعر

وسلام عليكم

 

[أبوفلان]

,
,

تسلم يالمطيري ماقصرت

لا والله ماني راعي بر يمكن بس حق مخيم بس أما مقناص وطلعات الصمان لا والله

ننتظر باقي يالشباب

 

[خدمة الشعب]

أخوي أبو فلان

ما شاء الله عليك أنت يا أما فوق و إلا تحت ما عندك وسط

شوف وأنا أخوك :

بالكويت الكشخه ضايعه يعني اللي معاه و اللي ما معاه يكشخ ,,

ليش تحمل نفسك مديونيه 20 ألف وقسط 300

واللي يقهر هالهنود والتكاسي عادي يدعم لكزس كأنه داعم ( لادا ) ,,

وبعدها فك روحك , ويطيب خاطرك من السياره .

أشتر سيارتين ( الجمس / والاوريون ) أبرك لك ألف مره , على الأقل ما تتحسف وبيعتهم سهله .

والله يوفقك​

 

[أبوفلان]

أخوي خدمة الشعب والله النصيحة أغلى من كل شي

تسلم يالغالي واسم على مسمى

 

[^البرنس^]

سؤال الاول اخوي

انت ليش تبي سيارتين ؟؟

 

[أبوفلان]

سؤال الاول اخوي

انت ليش تبي سيارتين ؟؟

وحده صالون عشان ماتصرف واايد بس صغيرة مو وسيعه نفس اللكزس

والثانية عائلية مع ان العايلة مو كبيرة بس تكون واسعه

 

[^البرنس^]

والله يا اخوي

شوف جان تبي نصيحة مجرب

انا عندي يوكن موديل 2001 وما اشتكي من صرف البانزين ولا شي والوضع طبيعي
واهو حق العايله وبنفس الوقت حقك وين ماتبي تروح تروح

فما يحتاج تاخذ سيارتين وقسطين

واذا على البانزين احسب القسط الي على السياره الثانيه لو تاخذ سياره وحده يكون نص القسط بانزين

فلا تستعيل يا اخوي

 

[الحمرانيـ]

شدعووه اللكزس 20 الف والفوائد طايحه شلون لو للحين مرتفعه الله يعينك على القسط الي بيكون عليك

اللكزس اللون الي حاط صووورته مجرم عليه احلى من الابيض وعند واحد ويمدحه مايشكي من خراباته ويقول السياره سعرها فيها بس صراحه هم سعرها يكسر الظهر والله لو تاخذلك اريون وتريح مزجك وسيع وحلووه وماتحس فيها بالطريج وفخمه






الله يوفقك اخوووي بأختيارك وأستخير

 

[بومعالي]

أخوي أولا ما يعطونك مديونيه على سيارة أكثر من 15 ألف بحد أقصى مهما كان الراتب

ثانيا حرام تاخذ لكزس دام ماعندك كاش ...الفلوس هذي إنت أولا فيها من السيارة

ثالثا اخذ لك سيارة وحده وريح بالك ومايحتاج سيارتين وإذا كلش كلش خذ سيارة ثانية صالون صغيره سعرها ما يتعدى 1500 دينار للدوام والمشاوير السريعه واترك عنك الأوريون ..

نصيحتي اخذ لك تاهو أو يوكن وكاله أو مستعمل 2008 وريح بالك ... التاهو ناعم بالخط ومريح و وسيع ولا تسأل عن البنزين تراه اقتصادي وقطع غياره بكل مكان ويصلح للسفر والمشاوير .

 

[مهم للغاية]

طالما طلبت راي الجميع

انا رأيي من رأي اخوي بومعالي

أخوي أولا ما يعطونك مديونيه على سيارة أكثر من 15 ألف بحد أقصى مهما كان الراتب

ثانيا حرام تاخذ لكزس دام ماعندك كاش ...الفلوس هذي إنت أولا فيها من السيارة

ثالثا اخذ لك سيارة وحده وريح بالك ومايحتاج سيارتين وإذا كلش كلش خذ سيارة ثانية صالون صغيره سعرها ما يتعدى 1500 دينار للدوام والمشاوير السريعه واترك عنك الأوريون ..

نصيحتي اخذ لك تاهو أو يوكن وكاله أو مستعمل 2008 وريح بالك ... التاهو ناعم بالخط ومريح و وسيع ولا تسأل عن البنزين تراه اقتصادي وقطع غياره بكل مكان ويصلح للسفر والمشاوير .

 

[خالد المطير]

أبو فلان يقلبي اذا انت رجال مقتدر وميسور الحال وعندك دخل ثاني غير الراتب أخذ اللكزس 460 وراح تدعيلي وأسأل مجرب واهم شي تستخير الله يعني صل ركعتين اذا رسيت على شي واذا هو خير لك بيرزقك الله فيه

 

[أبوفلان]

الله يعطيكم العافية ياشباب ماقصرتوا

والله أثلجتوا الصدر بردودكم

خلاص بإذن الله قررت آخذ اليوكن فقط لاغير

اما اللكزس كلمت التمويل قال مانعطيك إلا تدفع مقدم 6 آلاف لو عندي 6 آلاف مادقيت عليهم

يعطيكم ألف عافية